James 4
1តើការទាស់ទែងនិងជម្លោះក្នុងចំណោមអ្នករាល់គ្នាកើតមកពីណា? តើមិនមែនមកពីចិត្តស្រើបស្រាលដែលច្បាំងក្នុងអវយវៈរបស់អ្នករាល់គ្នាទេឬ? 2អ្នករាល់គ្នាលោភចង់បានប៉ុន្ដែមិនបានអ្វីឡើយ។ អ្នករាល់គ្នាសម្លាប់គេហើយច្រណែនគេប៉ុន្ដែមិនអាចទទួលបានអ្វីឡើយ។ អ្នករាល់គ្នាឈ្លោះហើយទាស់ទែងគ្នា។ អ្នករាល់គ្នាមិនបានអ្វីសោះព្រោះអ្នករាល់គ្នាមិនបានសុំ។ 3អ្នករាល់គ្នាសុំដែរប៉ុន្ដែមិនបានទទួលអ្វីឡើយពីព្រោះអ្នករាល់គ្នាសុំដោយបំណងអាក្រក់គឺអ្នករាល់គ្នាចង់បានសម្រាប់តែចាយបំពេញចិត្ដស្រើបស្រាលរបស់ខ្លួនប៉ុណ្ណោះ។ 4ឱពួកផិតក្បត់អើយ! តើមិនដឹងទេឬថាការស្រលាញ់លោកិយជាសត្រូវព្រះជាម្ចាស់? ដូច្នេះអ្នកណាចង់ធ្វើមិត្តរបស់លោកិយអ្នកនោះតាំងខ្លួនជាសត្រូវនឹងព្រះជាម្ចាស់ហើយ។ 5តើអ្នករាល់គ្នាស្មានថាបទគម្ពីរគ្មានប្រយោជន៍ឬដែលបានចែងទុកថាព្រះវិញ្ញាណដែលព្រះជាម្ចាស់ឲ្យសណ្ឋិតនៅក្នុងយើងនោះព្រះអង្គស្រលាញ់ដោយចិត្ដប្រចណ្ឌ 6ប៉ុន្ដែព្រះអង្គផ្ដល់ព្រះគុណកាន់តែខ្លាំងឡើងៗហេតុនេះហើយបានជាមានសេចក្ដីចែងទុកថា៖ «ព្រះអង្គប្រឆាំងនឹងមនុស្សអួតអាងប៉ុន្ដែផ្ដល់ព្រះគុណដល់មនុស្សបន្ទាបខ្លួនវិញ»។ 7ដូច្នេះត្រូវចុះចូលជាមួយព្រះជាម្ចាស់ហើយប្រឆាំងនឹងអារក្សនោះវានឹងរត់ចេញពីអ្នករាល់គ្នា។ 8ចូរចូលទៅជិតព្រះជាម្ចាស់នោះព្រះអង្គនឹងចូលមកជិតអ្នករាល់គ្នាវិញឱមនុស្សបាបអើយ! ចូរលាងដៃឲ្យបានស្អាតចុះឱមនុស្សមានចិត្តពីរអើយ! ចូរជម្រះចិត្តឲ្យបានបរិសុទ្ធចុះ។ 9ចូរមានទុក្ខវេទនាហើយកាន់ទុក្ខព្រមទាំងយំសោកចូរឲ្យសំណើចរបស់អ្នករាល់គ្នាត្រលប់ជាទុក្ខព្រួយចុះហើយឲ្យអំណររបស់អ្នករាល់គ្នាត្រលប់ជាភាពសោកសង្រេងវិញ។ 10ចូរបន្ទាបខ្លួននៅចំពោះព្រះអម្ចាស់នោះព្រះអង្គនឹងលើកតម្កើងអ្នករាល់គ្នាឡើង។ 11បងប្អូនអើយ! មិនត្រូវនិយាយមួលបង្កាច់គ្នាឡើយអ្នកណាដែលនិយាយមួលបង្កាច់ឬថ្កោលទោសបងប្អូនរបស់ខ្លួនអ្នកនោះនិយាយមួលបង្កាច់និងថ្កោលទោសក្រឹត្យវិន័យហើយ។ បើអ្នកថ្កោលទោសក្រឹត្យវិន័យនោះអ្នកមិនមែនជាអ្នកប្រព្រឹត្តតាមក្រឹត្យវិន័យទេគឺជាអ្នកថ្កោលទោសវិញ។ 12មានតែព្រះអង្គមួយប៉ុណ្ណោះដែលជាអ្នកផ្ដល់ក្រឹត្យវិន័យហើយជាចៅក្រមដែលអាចសង្គ្រោះនិងបំផ្លាញបាន។ រីឯអ្នកវិញតើអ្នកជាអ្នកណាបានជាហ៊ានថ្កោលទោសអ្នកជិតខាងរបស់ខ្លួនដូច្នេះ? 13ចូរមក៍ឱពួកអ្នកដែលនិយាយថាថ្ងៃនេះឬថ្ងៃស្អែកយើងនឹងធ្វើដំណើរទៅកាន់ក្រុងមួយហើយស្នាក់នៅទីនោះមួយឆ្នាំរួចរកស៊ីឲ្យបានចំណេញអើយ! 14អ្នករាល់គ្នាមិនដឹងថាថ្ងៃស្អែកមានអ្វីកើតឡើងទេហើយក៏មិនដឹងថាជីវិតរបស់អ្នករាល់គ្នានឹងទៅជាយ៉ាងណាដែរ! ដ្បិតអ្នករាល់គ្នាគ្រាន់តែជាចំហាយទឹកដែលមានតែមួយភ្លែតហើយហួតអស់ទៅវិញប៉ុណ្ណោះ។ 15ផ្ទុយទៅវិញអ្នករាល់គ្នាគួរតែនិយាយថាបើព្រះអម្ចាស់សព្វព្រះហឫទ័យយើងនឹងមានជីវិតរស់ហើយយើងនឹងធ្វើការនេះឬការនោះ 16ប៉ុន្ដែឥឡូវនេះអ្នករាល់គ្នាអួតអាងអំពីអំនួតរបស់ខ្លួនវិញដែលការអួតអាងបែបនេះសុទ្ធតែអាក្រក់ទាំងអស់។ 17ដូច្នេះអ្នកណាដែលដឹងអំពើល្អដែលគួរធ្វើប៉ុន្ដែមិនព្រមធ្វើអ្នកនោះមានបាបហើយ។
Copyright information for
KhmKCB